झापाको अर्जुनधारा नगरपालिकाका एक किसनले बेमौसमी लहरे तरकारी खेतीमा सफलता हात पारेका छन् । अर्जुनधारा–८, स्थिति मामा भान्जा फार्म तथा अनुसन्धान केन्द्रका निर्मल अधिकारीले लगाएको लहरे तरकारी खेतीले बारी लहलह भएको छ ।
यसअघि वैदेशिक रोजगारीमा रहेका अधिकारी वैदेशिक रोजगारबाट स्वदेश फर्किएपछि गाउँघरमै बसेर आधुनिक खेती गर्न थालेका हुन् । उनले स्वदेशमै केहि गर्नु उचित ठान्दै लहरे तरकारी खेतीमा लागेका हुन् ।
हाल उनले शुरु गरेको बेमौसमी लहरे तरकारीले उनको फार्म लहलह छ । अधिकारीले अरुको देशमा गएर गर्ने दु:ख आफ्नै देशमा गर्न सके नेपालमा पनि तरकारी खेतीबाट राम्रो आम्दानी गर्न सक्ने बताएका छन् ।
