दुईदिने औपचारिक भ्रमणमा नेपाल आउन लागेका कतारका अमिर शेख तमिम बिन हमाद अल थानीलाई नेपाल सरकारले २१ तोपको सलामी सहित सम्मान गर्ने भएको छ । उनि ८० सदस्यीय प्रतिनिधिमण्डलको नेतृत्व गर्दै आज नेपाल भ्रमणमा आउँदै छन् । उनी नेपाल आउने दिन आज सरकारले सार्वजनिक बिदा समेत दिएको छ ।
१० जना कतारी मन्त्री सहित कतारको प्रतिनिधिमण्डलमा भ्रमणमा सहभागी हुने बताईएको छ । खाडी राष्ट्रहरूबाट नेपालमा हुन लागेको यो हालसम्मै सबैभन्दा उच्चस्तरको भ्रमण भएको र कतारका शेख अमिरको भ्रमणपछि अन्य खाडी राष्ट्रका राष्ट्रध्यक्ष तथा सरकार प्रमुखहरूलाई पनि नेपाल ल्याउन सहज हुने बताईएको छ ।
अमिर थानी राष्ट्रपति रामचन्द्र पौडेलको निमन्त्रणामा नेपाल आउन लागेका हुन् । उनलाईलाई राष्ट्रपति रामचन्द्र पौडेलले त्रिभुवन अन्तर्राष्ट्रिय विमानस्थलमा स्वागत गर्ने तयारी रहेको छ । विमानस्थलको अति विशिष्ट कक्षमा २१ तोपको सलामी दिएर सम्मान गरिने कार्यक्रम रहेको छ ।
त्यसैगरी राष्ट्रपति पौडेलले कतारका अमिरको सम्मानमा राजकीय भोजको आयोजना गर्ने कार्यक्रम छ । अमिर थानीले वैशाख १२ गते प्रधानमन्त्री पुष्पकमल दाहाल प्रचण्डसँग द्विपक्षीय वार्ता गर्ने र वार्तापछि दुवै जनाले द्विपक्षीय सम्झौता र समझदारीपत्रमा हस्ताक्षर गर्ने कार्यक्रममा हुनेछ । अमिर शेख वैशाख १२ गते स्वदेश फर्कने छन् ।
