नेपाल पेट्रोलियम ट्यांकर चालक संघको आन्दोलनका कारण निजी पेट्रोल पम्पहरुले पेट्रोलियम पदार्थको बिक्री नगर्दा पेट्रोल पम्पहरुमा सवारी साधनको लाइन लागेको छ । पेट्रोलियम मजदुरहरुले विभिन्न माग राखी आपूर्ति रोक्दा पम्पहरुमा इन्धन अभाव भएसंगै सवारी साधनको लाइन लागेको हो ।
काठमाडौंका पेट्रोल पम्पहरुमा लामो समयपछि सवारी साधनहरुको लाइन लागेको हो । राजधानीका निजी पेट्रोल पम्पहरुले पेट्रोलियम पदार्थको बिक्री रोकेकाले नेपाल प्रहरी, आर्मी र सशत्रको पेट्रोल पम्पमा सर्वसाधारणको भीड लागेको छ ।
यसअघि भारतले नेपालमा लगाएको अघोषित नाकाबन्दीको समयमा र त्यसपछि २०७८ सालमा पेट्रोलियम पदार्थ ढुवानी व्यवसायीहरुको आन्दोलनका कारण इन्धन अभाव भएको थियो । उक्त समयमा झैँ अहिले लामो समयपछि पेट्रोल पम्पहरुमा सवारी साधनहरुको लाइन लागेको छ ।
नेपाल आयल निगमका प्रवक्ता मनोज ठाकुरले पेट्रोलियम मजदुरहरुले विभिन्न माग राखी आपूर्ति रोक्दा पम्पहरुमा इन्धन अभाव भएको बताईएको छ । अधिकांश निजी पम्पमा ‘पेट्रोल छैन’ लेखिएको सूचना टाँस गरिएको छ भने खुलेका केही पेट्रोल पम्पहरुमा लामो समय पालो पर्खनुपर्ने बाध्यता देखिएको छ ।
गर्मीको बेला लामो समयसम्म लाइनमा बस्नुपर्दा सवारी चालकहरु हैरान देखिएका छन् । यता पेट्रोलियम मजदुरहरुले सबै ट्यांकर चालक/सहचालकको श्रम ऐन अनुसार नियुक्ति पत्र दिई नेपाल सरकारले तोके अनुसार तलवको व्यवस्था गर्न माग गरिएको छ ।
उनीहरुले स्वरोजगारको हकमा लागु गरिएको दोब्बर बैंक ग्यारेन्टी र वार्षिक नवीकरण खारेज गर्न तथा चालक र सहचालकलाई जोखिम भत्ताको व्यवस्था गर्न माग गरेका छन् ।
