आरक्षण विरुद्धको प्रदर्शनसंगै शेख हसिनाले प्रधानमन्त्री पदबाट राजीनामा दिँदै देश छाडेर हिँडेपछि राष्ट्रपति मोहम्मद साहबुद्दिनद्धारा अन्तरिम सरकार प्रमुख बनाईएका मोहम्मद युनुसले आज पद तथा गोपनीयताको शपथ लिने भएका छन् । बंगलादेशको राष्ट्रपति कार्यालयले उनलाई अन्तरिम सरकार प्रमुखको रूपमा शपथ गराउने तयारी गरेको हो ।

बंगलादेशका अन्तरिम सरकार प्रमुख युरोपमा रहेका ८४ वर्षीय नोबेल शान्ति पुरस्कार विजेता समेत रहेका मोहम्मद युनुसले आज दिउँसो २:१० बजे राजधानी ढाकामा पुगेपछि राष्ट्रपति कार्यालयले शपथ गराउने तयारी गरेको बताईएको छ । राष्ट्रपति मोहम्मद साहबुद्दिनले मोहम्मद युनुसलाई बुधबार अन्तरिम सरकार प्रमुखको जिम्मेवारी तोकिएको घोषणा गरेका थिए ।

बंगलादेशका ८४ वर्षीय युनुस माइक्रोफाइनान्सका संस्थापक समेत हुन् । बंगलादेशी निम्न वर्गको उत्थानका लागि काम गरेका युनुसलाई अन्तरिम सरकारको नेतृत्व दिन विद्यार्थी नेताहरूले गरेको आह्वानपछि जिम्मेवारी सुम्पिएको हो । 

राष्ट्रपति मोहम्मद साहबुद्दिन, सेना, नौसेना र वायुसेनाका प्रमुखसँग विद्यार्थी नेतासँगको बैठकपछि अन्तरिम सरकार प्रमुखको जिम्मेवारी दिने निर्णय गरिएको थियो ।