राष्ट्रिय स्वतन्त्र पार्टी (रास्वपा) का सभापति एंव पूर्वगृहमन्त्री रवि लामिछाने पक्राउको विषयलाई लिएर पोखरामा दुई पक्षीय प्रदर्शन हुन थालेपछि स्थानीय प्रशासनले अनिश्चितकालीन निषेधाज्ञा जारी गरेको छ ।
कास्कीका प्रमुख जिल्ला अधिकारी भरतमणी पाण्डेले आज अपरान्ह पौने १२ बजेदेखि अर्को आदेश नभएसम्मका लागि पोखरा महानगरपालिकामा निषेधाज्ञा जारी गरेका हुन् । निषेधाज्ञा जारी गरिएको क्षेत्रमा पाँच जनाभन्दा बढी व्यक्ति भेला जम्मा भई अनसन, धर्ना, घेराउ, जुलुस, प्रदर्शन तथा सभाजस्ता विरोधका कार्यक्रम गर्न निषेध गरिएको छ ।
आदेशको उल्लंघन गर्ने वा आदेशको पालना गर्ने गराउने कार्यमा अवरोध गर्ने जोसुकैउपर प्रचलित कानूनबमोजिम कारबाही हुने सीडियो कार्यालयले जनाएको छ । सीडियो कार्यालयले शहिदचोक आसपास पूर्वतर्फ वाई चोक, पश्चिमतर्फ फिस्टेल गेट, उत्तरतर्फ मालपोत कार्यालय, दक्षिणतर्फ मुस्ताङ्ग चोक क्षेत्रलाई निषेधित क्षेत्र घोषणा गरेको छ ।
यस्तै, गैह्रापाटन आसपास पालिखेचोकदेखि नविन माविसम्मको सडक क्षेत्रमा पनि निषेधाज्ञा जारी गरिएको छ ।
