तराईका धेरै भू–भागमा बाक्लो हुस्सु र कुहिरो लागेको कारण जनजीवन प्रभावित भएको छ । पश्चिमी वायुको सामान्य प्रभावका कारण तराई लगायत देशका बिभिन्न भागमा बाक्लो हुस्सु र कुहिरो लाग्नुका साथै मौसम आंशिक बदली भएको छ ।
पश्चिमी वायुको सामान्य प्रभावको कारण कोशी, बागमती, गण्डकी र लुम्बिनी प्रदेशका पहाडी भू–भागको मौसम आंशिक बदली हुनुका साथै तराईका धेरै भू–भागमा बाक्लो हुस्सु र कुहिरो लागिरहेको मौसम विज्ञान विभागले जनाएको छ ।
विभागका अनुसार देशका बाँकी भेगको मौसम मुख्यतया सफा रहेको छ । उक्त चार प्रदेशको मौसम बदली भए पनि वर्षाको सम्भावना नरहेको पनि मौसम पूर्वानुमान महाशाखाले जनाएको छ । बिहानको समयमा देशका तराई तथा उपत्यकाका धेरै स्थानमा हुस्सु र कुहिरो लाग्ने भएकाले दैनिक जनजीवन, कृषि, स्वास्थ्य, यातायात तथा हवाई उडानमा असर पर्ने बताइएको छ ।
