ताप्लेजुङको पाथीभरा (मुक्कुमलुङ) क्षेत्रमा केबलकार निर्माणको विरोधमा कोशी प्रदेश केन्द्रित आन्दोलन गर्दै आएका पहिचानवादीहरुले अब राजधानीमा पनि प्रदर्शन गर्ने भएका छन् । केबलकार निर्माण र मुक्कुमलुङ अतिक्रमणविरुद्ध भोलिदेखि माइतीघर मण्डलामा सडक नाटक गर्न लागिएको हो ।
मुक्कुमलुङ ताङ्सेःप चुम्भो र मुक्कुमलुङ संरक्षण अन्तर्दलीय संघर्ष समितिको आयोजनामा ‘सरकार छातीमा गोली ठोकेर, हाम्रो अस्तित्वलाई ढाल्न सक्दैनौं’ भन्ने शीर्षकमा भोलि दिउँसो साढे १२ बजेबाट माइतीघर मण्डलामा सडक नाटकसँगै कविता सुनाउने कार्यक्रम रहेको छ । समितिले कार्यक्रममा सहभागी हुन सम्पूर्णलाई आग्रह समेत गरेको छ । भनिएको छ, ‘तपाईँ हाम्रो सहभागिा, मुक्कुमलुङ संरक्षणका लागि बल पुग्नेछ ।’
पाथीभरा क्षेत्रमा चलिरहेको केबलकार निर्माणको लफडाले उग्र रुप लिइरहेको छ । केबलकार निर्माणको विरोध गर्दै आएका पहिचानवादीहरुले गत माघ १५ गतेदेखि अनिश्चितकालीन यातायात बन्द गरेका छन् । यातायात बन्दका कारण अत्यावश्यक काममा सर्वसाधारण जिल्लाबाट बाहिर जान नसक्ने अवस्थामा पुगेका छन् ।
