गोरखा जिल्लामा रहेको विभिन्न धार्मिक स्थलको पूजा आराधना तथा दर्शनका लागि पूर्वराजा ज्ञानेन्द्र शाह गोरखा जाने भएका छन् । गोरखाको गोरखनाथ, गोरखकाली र मनकामना मन्दिरमा पूजा आराधना तथा दर्शनका लागि पूर्वराजा ज्ञानेन्द्र यसै हप्ता गोरखा जाने भएका हुन् ।
यसअघि पूर्वराजा ज्ञानेन्द्र लामो समय नेपालगञ्ज र पोखरामा बसेर अघिल्लो साता मात्रै काठमाडौं फर्किएका थिए । यसै हप्ता विभिन्न मन्दिर तथा शक्तिपीठको पूजा आराधना तथा दर्शनका गर्नका लागि गोरखा जान लागेको पूर्वराजा ज्ञानेन्द्रका सम्वाद सचिव फणिराज पाठकले जनाएका छन् ।
अघिल्लो साता पूर्वराजा ज्ञानेन्द्र पोखराबाट फर्कंदा उनको समर्थनमा विमानस्थलदेखि निर्मल निवाससम्म भिड लागेको थियो । त्यसपछि पूर्वराजाका समर्थक र राजावादीहरुले राजा र राजसंस्थाको पक्षमा विभिन्न भेलाहरु आयोजना गर्दै आएका छन् ।
