आजभन्दा १० वर्ष अघि आजैकाे दिन बैशाख १२ गते गोरखाको बारपाकलाई केन्द्रबिन्दु बनाएर गएको भूकम्पले ठूलो जनधनको क्षति गरेकाे दिनकाे सम्झनामा भूकम्प स्मृति दिवस मनाउन लागिएको छ । विसं २०७२ वैशाख १२ गतेकाे उक्त विनाशकारी भूकम्पमा ठूलो जनधनको क्षति भएकाले हरेक वर्ष भूकम्प स्मृति दिवस मनाउन लागिएको हाे ।
उक्त दिन गएकाे ७.६ म्याग्निच्युडको भूकम्पमा परि ८ हजार ९ सय ७९ जनाले ज्यान गुमाएका थिए भने २२ हजार ३ सय ९ जना घाइते भएका थिए । सोही विनाशकारी भूकम्पको स्मृतिमा आज विभिन्न कार्यक्रमको आयोजना गरिएको छ ।
आज काठमाडौंको सुन्धारामा अवस्थित धरहरा परिसरमा प्रधानमन्त्री केपी शर्मा ओलीको प्रमुख आथित्यतामा भूकम्प स्मृति दिवसको विशेष कार्यक्रम आयोजना गरिएको छ । ‘सुरक्षित पूर्वाधार निर्माण गरौं, भूकम्पबाट जोगिऔ’ भन्ने सन्देश दिनका लागि भूकम्प स्मृति दिवस मनाउन लागिएको हो ।
त्यस्तै हिँजाे साँझ ७ बजेर ३४ मिनेटमा ४.२ म्याग्निच्यूडको भूकम्प गएकाे राष्ट्रिय भूकम्प मापन तथा अनुसन्धान केन्द्रले जनाएकाे छ । रुकुमपूर्वको रन्मामैकोटलाई केन्द्रबिन्दु बनाएर भूकम्प गएको बताइएकाे छ ।
पछिल्लाे समय पश्चिम नेपालमा लगातार भूकम्प गइरहेको छ । यसअघि २०८० कात्तिक १७ गते जाजरकोटको बारेकोटलाई केन्द्रबिन्दु बनाएर ६.४ म्याग्निच्युडको भूकम्प गएको थियो भने त्यसपछि पनि लगातार जाजरकोटका विभिन्न स्थानलाई केन्द्रबिन्दु बनाएर भूकम्प गइरहेकाे छ ।
