काठमाडौं महानगरपालिकाले वडा नम्बर २४, मखन टोलमा भएको आगलागी समयमै नियन्त्रणमा आउन नसक्नुको कारण पत्ता लगाउन छानबिन समिति गठन गर्ने भएको छ । दुई मिनेटमै दमकल पुग्नसक्ने ठाउँको आगो घण्टौंसम्म नियन्त्रणमा लिन नसक्नुको कारण पत्ता लगाउन महानगरकी उपमेयर सुनिता डंगोलले निर्देशन दिएकी हुन् ।

उनले आज प्रमुख प्रशासकीय अधिकृत सरोज गुरागाईंलाई त्यसबारे अनुसन्धानका निम्ति छानबिन समिति गठन गर्न निर्देशन दिएकी हुन् । गत बुधबार मखन टोलस्थित स्थानीय दयाराम श्रेष्ठको घरमा ग्यास चुहिएर आगलागी हुँदा काभ्रेपलाञ्चोककी ८० वर्षीया विष्णु अधिकारीको ज्यान गएको थियो । सो दिन बिहान पौने ७ बजेदेखि लागेको आगो १० बजेतिर मात्रै नियन्त्रणमा आयो । आगो फैलिँदा अन्य दुईटा घरमा समेत क्षति पुग्यो ।

उपमेयर डंगोलले भनिन्, ‘दमकल स्टेशनबाट २ मिनेटभित्र दमकल पुग्नसक्ने ठाउँको आगो नियन्त्रणमा लिन किन समय लाग्यो ? यसमा के समस्या थियो ? के कारण थियो ? कसको लापर्बाही थियो ? जसका कारण आगो सल्किएको घरबाट नजिकका २ वटा घरमा आगो फैलिएर क्षति भयो । यसको छानबिन हुनुपर्छ । सत्य पत्ता लगाएर आउँदा दिनमा यस प्रकारका कमजोरी हुन दिनुहुँदैन ।’

आगलागी नियन्त्रणका लागि तत्परतामा कमजोरी भएको गुनासो आएको जनाउँदै उनले घटनास्थलमा दमकल लैजान पूर्वाधारजन्य अवरोध वा व्यवस्थापनमा भएका चूनौती र कमजोरीबारे दमकल, एम्बुलेन्स, स्थानीयबासी, जनप्रतिनिधिसँग छलफल गरेर सुक्ष्म अध्ययन गर्न निर्देशन दिएकी छन् । साथै, यस्ता घटनाको जोखिम घटाउन पूर्वतयारी, खोज उद्धार र घटनापछिको राहत तथा पुनःस्थापनाका विषयमा समितिले सिफारिस गर्ने उपमेयर डंगोलको भनाइ छ ।