गत असार २४ मा ल्हेन्देखोलाकाे बाढीले बगाएकाे नेपाल–चीन सिमाको मितेरी पुलमा बेलिब्रिज जडान शुरु भएसँगै रसुवागढी नाका दशैँअघि नै सञ्चालन हुने भएकाे छ । अहिले ल्हेन्देखोलामा बेलिब्रिज जडान शुरु भएकाले दशैँअघि नै रसुवागढी नाका सञ्चालन हुने भएकाे हाे ।

त्रिदेशीय अन्तरराष्ट्रिय राजमार्गका रूपमा विस्तार भइरहेको ‘गल्छी-त्रिशूली-मैलुङ-स्याफ्रुबेसीँ-रसुवागढी सडक योजना’को अवलोकन गरेर नुवाकोटमा पत्रकारहरूसँग कुरा गर्दै भौतिक पूर्वाधार तथा यातायातमन्त्री देवेन्द्र दाहालल रसुवागढी नाका दशैँअघि नै सञ्चालन गर्नेगरी तयारी थालिएकाे बताएका थिए ।

हाल गल्छी–रसुवागढी त्रिदेशीय राजमार्ग सञ्चालन गराई चाडपर्वका वेला नाका सञ्चालनमा ल्याउन सम्बन्धित निकायलाई परिचालन गरिएको बताउँदै मन्त्री दाहालले भने, ‘रसुवातर्फ स्याफ्रुबेसी–रसुवागढी सडकखण्ड चीन सरकारको सहयोगमा सञ्चालन गर्ने सहमति भएको छ ।’

यसअघि गत असार २४ मा ल्हेन्देखोलामा उर्लिएको बाढीले नेपाल–चीन मैत्रीको प्रतीक मितेरी पुल बगाएको थियो भने ठूलाे जनधनकाे क्षेति भएकाे थियाे । उक्त मितेरी पुल बगाउँदा त्यहाँ अलपत्र परेका १ हजार २०० जना नेपालीलाई परराष्ट्र मन्त्रालयमार्फत चीन सरकारकाे सहयाेगमा सिन्धुपाल्चाेककाे ताताेपानी नाका हुँदै स्वदेश फर्काइएकाे थियाे ।