चाडपर्वलाई लक्षित गरि हरेक वर्ष सरकारले सञ्चालन गर्ने सुपथ मूल्य पसल यसपटक भदौ अन्तिम सातादेखि सुरु हुने भएकाे छ । सरकारले दशैं, तिहार र छठ पर्वको अवसरमा हरेक वर्ष सुपथ मूल्य पसल सन्चालन गर्दै आएकोमा यस वर्ष पनि सुपथ मूल्य पसल सञ्चलनकाे तयारी थालेकाे हाे ।
उद्योग, वाणिज्य तथा आपूर्ति मन्त्रालयका अनुसार यसवर्ष दशैंको घटस्थापनाभन्दा १५ दिन अघिदेखि सुपथ मूल्य पसल सन्चालन गर्ने गरी तयारी थालिएको बताइएकाे छ । यस वर्षको दशैंको घटस्थापना असोज ६ गते परेको छ भने टीका असोज १६ गते परेकाे छ । जनअनुसार सुपथ मूल्य पसल भदौ अन्तिम सातादेखि सुरु हुनेछ ।
सुपथ मूल्य पसलमा विगतमा जस्तै खाद्य व्यवस्था तथा व्यापार कम्पनी लिमिटेड र साल्ट ट्रेडिङ कम्पनीले विभिन्न खाद्य सामग्रीहरुमा उपभोक्तालाई छुट दिने तयारी गरिएकाे भएपनि कुन सामग्रीमा कति रुपैयाँ छुट दिने र सुपथ मूल्य पसल कहाँ–कहाँ राख्ने भन्ने निश्चित भइसकेको छैन ।
उद्योग, वाणिज्य तथा आपूर्ति मन्त्रालयको उपभोक्ता संरक्षण महाशाखाले यस वर्ष उपभोक्ताले सहुलियत पाउने गरी सुपथ पसल सन्चालन गर्ने तयारीमा जुटिसकेका र छुट मूल्यको विषयमा कम्पनीबाट प्रस्ताव आएपछि छलफल गरेर निर्णयमा पुग्ने बताइएकाे छ । मन्त्रालयका अनुसार यस वर्ष पनि अनलाइनमार्फत् अर्डर गर्न मिल्ने र उपभोक्ताको घरसम्मै पुर्याइदिने व्यवस्था मिलाउने तयारी समेत रहेकाे छ ।
त्यसैगरि सरकारले सुपथ मूल्य पसलबाट नुन, तेल, चामल, दाल, चिनी, चियापत्ती, पिठो, घ्युदेखि खसीबोका र च्याङ्ग्रासम्म बिक्री वितरण गर्दै आएकाे छ ।
