विदेशमा अध्यन गर्न जानेकाे लहर चलेसँगै पछिल्लाे एक महिनामा वैदेशिक अध्यनका लागि १४ अर्ब ३१ करोड बराबरको रकम विदेशिएको छ । नेपालमाै सुविधा सम्पन्न विश्वविद्यालय, कलेज तथा आवश्यक शैक्षिक संस्था भए पनि अध्ययनका लागि विदेशिनेक्रम बढेसँगै उक्त रकम बाहिरिएकाे हाे ।
अध्ययनका लागि विदेशिनेक्रम घट्नुको साटो बढ्दै गएको र एक महिनाको अवधिमा मात्रै अध्ययनका लागि १४ अर्ब ३१ करोड बराबरको रकम विदेशिएको नेपाल राष्ट्र बैंकले सार्वजनिक गरेको विवरणमा उल्लेख गरिएकाे छ । राष्ट्र बैंकका अनुसार शिक्षातर्फको व्यय गत वर्षको तुलनामा थोरै कम छ ।
चालु आर्थिक वर्षको पहिलो महिनामा अध्यनयका लागि १४ अर्ब ३१ करोड रकम विदेशिएकाे छ भने गत आवको सोही अवधिमा १४ अर्ब ९६ करोड रहेकाे थियो । चालु आवको पहिलो महिनामा सेवा खाताअन्तर्गत भ्रमण व्यय २ं.८ प्रतिशतले कमी आई २१ अर्ब ७० करोड पुगेको छ भने अघिल्लो वर्षको सोही अवधिमा भ्रमण व्यय २२ अर्ब ३२ करोड रहेको थियो ।
समीक्षा अवधिमा खुद सेवा आय १३ अर्ब ३९ करोडले घाटामा रहेको छ भने अघिल्लो वर्षको सोही अवधिमा खुद सेवा आय १५ अर्ब ६ करोडले घाटामा रहेको थियो । सेवा खाताअन्तर्गत समीक्षा अवधिमा भ्रमण आय १२.७ प्रतिशतले वृद्धि भई ५ अर्ब ३८ करोड पुगेको छ भने अघिल्लो वर्षको सोही अवधिमा यस्तो आय ४ अर्ब ७७ करोड थियो ।
