दशैँ, तिहार, छठ लगायतका चाडपर्व नजिकिएसँगै उपत्यका बाहिर जाने यात्रुलाई लक्षित गरी ट्राफिक प्रहरीले काठमाडौँ उपत्यकाको १५ स्थानमा यात्रु सहायता कक्ष सञ्चालन गरेको छ । ट्राफिक प्रहरीले यात्रुको सहजतालाई लक्षित गरी यात्रु सहायता कक्ष स्थापना गरेकाे हाे ।

काठमाडौँ महानगरपालिकाको सहकार्यमा ट्राफिक प्रहरीले सिप्रदी र नाडाको सहयोगमा यात्रु सहायता कक्ष स्थापना गर्न लागेको हाे । जसअनुसार नयाँ बसपार्क, नागढुङ्गा, कलङ्की, स्वयम्भू, हलचोक, माछापोखरी, चावहिल, तिलगङ्गा, कोटेश्वर, जगाती, सातदोबाटो, बल्खु, दक्षिणकाली, सुन्धारा र साँगामा यात्रु सहायता कक्ष स्थापना गरिएकाे बताइएकाे छ ।

चाडपर्व लक्षित उक्त स्थानको यात्रु सहायता कक्ष सञ्चालनमा आएसँगै यात्रुलाईग सहजता मिल्नुका साथै यात्रु सहायता कक्षमा खटिएको यातायात व्यवस्था विभाग, ट्राफिक प्रहरी र व्यवसायीसहितको टोलीले तोकिएको भाडादरभन्दा बढी भाडा लिए–नलिएको, लामो दूरीका सवारीसाधनमा दुईजना चालक भए–नभएको जाँच गर्ने नेपाल यातायात व्यवसायी राष्ट्रिय महासंघका अध्यक्ष विजयबहादुर स्वाँरले जानकारी दिएका छन् ।