सरकारले हरेक वर्ष झैँ यसवर्ष पनि कात्तिक २० र २१ गते राष्ट्रिय भिटामिन ‘ए’ तथा जुकाको औषधि खुवाउने भएकाे छ । प्रत्येक वर्ष सरकारले दुई चरणमा यो कार्यक्रम सञ्चालन गर्दै आएको छ ।
यसअघि पहिलो चरणमा कात्तिक २ र ३ र दाेश्राे चरणमा वैशाख ६ र ७ गते यो कार्यक्रम सञ्चालन हुँदैन आएको थियाे । यस वर्ष सोही मितिमा दिपावलीको लक्ष्मी पूजा पर्न गएकाले स्वास्थ्य तथा जनसङ्ख्या मन्त्रालयको सचिवस्तरीय निर्णयअनुसार कार्यक्रम सारिएको स्वास्थ्य सेवा विभागअन्तर्गत परिवार कल्याण महाशाखाले जनाएको छ ।
७५३ स्थानीय तहमा दुईदिने अभियानमा पाँच वर्षमुनिका करिब २८ लाख बालबालिकालाई भिटामिन ‘ए’ र करिब ३० लाख बालबालिकालाई जुकाको औषधि खुवाइने लक्ष्य राखिएको महाशाखाका निर्देशक डा विवेककुमार लालले जनाए ।
उक्त अभियानका लागि ५२ हजार स्वास्थ्य स्वयंसेविका र १५ हजार जना स्वास्थ्यकर्मी परिचालन गरिने बताइएकाे छ । अभियानमा छ महिनादेखि ११ महिनाका बालबालिकालाई भिटामिन ‘ए’ क्यापसुल मात्र र १२ देखि ५९ महिनासम्मका बालबालिकालाई भिटामिन ‘ए’ क्यापसुलका साथै जुकाको औषधि खुवाइने छ ।
