ग्रीस पठाइदिन्छु भन्दै ठगी गर्ने व्यक्ति पक्राउ
काठमाडौं, २७ फागुन, वैदेशिक रोजगारीमा आकर्षक तलबको प्रलोभनमा पारी ग्रीस पठाइदिन्छु भन्दै रकम ठगी गरेको अभियोगमा ललितपुर, ललितपुर महानगरपालिका १ बस्ने मोरङ पथरी शनिश्चरे नगरपालिका ३ घर भएका २२ वर्षीय सम्योग राईलाई मंगलबार प्रहरीले पक्राउ गरेको छ ।
राईले ग्रीस पठाइदिन्छु भन्दै ३ जना पीडितहरूबाट २५ लाख रूपैयाँ लिई सम्पर्कविहीन भएको भन्ने पीडितहरूको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उनलाई ललितपुर महानगरपालिका १३ बाट पक्राउ गरेको हो ।
अवैध लागूऔषध ब्राउनसुगर सहित एक जना पक्राउ
काठमाडौं, २७ फागुन, चन्द्रागिरी नगरपालिका २ नागढुङ्गाबाट अवैध लागूऔषध ब्राउनसुगर जस्तो देखिने पदार्थ ८८ ग्राम सहित धनकुटा महालक्ष्मी नगरपालिका ७ बस्ने ३० वर्षीया सबिना अधिकारीलाई बुधबार बिहान प्रहरीले पक्राउ गरेको छ ।
प्रहरी प्रभाग नागढुङ्गा र लागूऔषध नियन्त्रण ब्यूरो शाखा कार्यालय नागढुङ्गाबाट खटिएको प्रहरीले राजबिराजबाट काठमाडौंतर्फ आउँदै गरेको बा।प्र ००१.००६ ख ७४२० नम्बरको बसलाई जाँच गर्दा बसमा सवार उनलाई उक्त पदार्थ सहित फेला पारी पक्राउ गरेको हो ।
एकनाले भरूवा बन्दुक सहित एक जना पक्राउ
डडेल्धुरा, २७ फागुन, भागेश्वर गाउँपालिका १ सेल्टुडा बस्ने ६० वर्षीय धन बहादुर ठकुराठीलाई एकनाले भरूवा बन्दुक १ थान सहित बुधबार बिहान प्रहरीले पक्राउ गरेको छ ।
प्रहरी चौकी रूपालबाट खटिएको प्रहरीले उनको घर तलासी गर्दा उक्त बन्दुक फेला पारी पक्राउ गरेको हो ।
