नयाँ क्रान्ति नथाल्ने हो भने परिवर्तन उल्टिने खतरा छ, यस पटक सरकारबाटै नयाँ जनयुद्ध सुरूआत गरेको छु ।’ भदौ १२ को प्रम तथा माओवादीकेन्द्र अध्यक्ष प्रचण्डको यो अभिब्यक्तिले तरङ्ग ल्याएको छ । प्रम तथा अध्यक्ष प्रचण्डले नयाँ क्रान्ति नथाल्ने हो भने परिवर्तन उल्टिएर देश दुर्घटनामा पर्ने खतरा देखिएकाले आफूले प्रधानमन्त्रीको रूपमा माओवादीलाई मजबुत पार्न खोजेको बताए । प्रचण्डको यो उत्साहले अनेक चर्चा सुरूभएको छ ।
माओवादी कमजोर भयो भने प्रतिक्रियावादीले के के गर्छन् भन्ने सबैले देखेका छन्, यसकारण आफू शान्ति प्रक्रियालाई टुंगोमा पु¥याउन अग्रसर भएको छु । ममाथि जनयुद्धकालीन ३६ वटा मुद्दा छ, माओवादी कमजोर भए अरू थपिनेछन् । हामी एकजुट भएकाले ती मुद्दा थाँती रहेका छन् । माओवादीलाई नयाँ ढङ्गले बलियो पार्न सरकारमा बसेरै नयाँ खालको जनयुद्ध थालेको हुँ ।