बंगलादेशको संसदीय निर्वाचनमा बंगलादेश अवामी लिग पार्टीले दुई तिहाइ सिटमा जित हासिल गरेसंगै शेख हसिना चौथो कार्यकालका लागि प्रधानमन्त्री बन्ने भएकी छन् । प्रमुख प्रतिपक्षी दलको बहिस्कारका बाबजुद आइतबार भएको निर्वाचनमा जित हासिल गरेसंगै शेख हसिना लगातार चौथो कार्यकालका लागि प्रधानमन्त्री बन्ने भएकी हुन् ।

बंगलादेशको संसदीय निर्वाचनमा प्रधानमन्त्री शेख हसिनाको पार्टी बंगलादेश अवामी लिगले दुई तिहाइ जित हासिल गरेको छ । ३०० सिटका लागि भएको आम निर्वाचनमा बंगलादेश अवामी लिगले करिब २०० सिटमा जित हासिल गरेको बताईएको छ ।

पूर्वप्रधानमन्त्री खालिदा जिया नेतृत्वको बंगलादेश नेशनलिस्ट पार्टी (बीएनपी)ले भने यो निर्वाचनलाई देखावटी भन्दै बहिस्कार गरेको थियो । यता निर्वाचन आयोगका प्रवक्ताले ३०० मध्ये २९९ सिटमा शान्तिपूर्ण रुपमा निर्वाचन सम्पन्न भएको र मत परिणाम अनुसार अवामी लिगको सरकार बन्ने निश्चित भएको बताईएको छ ।

शेख हसिनाले गोपालगञ्ज-३ बाट २ लाख ४९ हजार ९६५ मत सहित शानदार जित हासिल गरेकी छन् । उनको निकटतम प्रतिस्पर्धी बंगलादेश सुप्रिम पार्टीका एम निजाम उद्दीनले ४६९ भोट मात्र पाएका थिए ।

शेख हसिनाले गोपालगञ्जबाट सन् १९८६ देखि आठ पटकसम्म चुनाव जित्दै बंगलादेशको सत्तामा सन् २००९ देखि निरन्तरता दिदै आएकी छन् । यसपटक प्रमुख प्रतिपक्षी दल बीएनपीले बहिस्कार गरेपछि हसिनाको पार्टी अवामी लिगले एकलौटी जित हात पारेको र चौथो कार्यकालका लागि प्रधानमन्त्री हुने पक्कापक्की भएको हो ।