सत्ता गठबन्धनको खटपट पछी प्रमुख प्रतिपक्ष दल बनेको नेपाली काँग्रेसले प्रधानमन्त्री पुष्पकमल दाहाल ‘प्रचण्ड’को विश्वासको मतको विपक्षमा मतदान गर्न ह्विप जारी गरेको छ । काँग्रेस संसदीय दलका प्रमुख सचेतक रमेश लेखकले एक विज्ञप्ति जारी गर्दै विश्वासको मतको विपक्षमा मतदान गर्न ह्विप जारी गरेका हुन् ।
काँग्रेसका सांसदहरुलाई फागुन ३० को प्रतिनिधि सभा बैठकमा अनिवार्य उपस्थिति हुन निर्देशन गर्दै प्रमुख सचेतक लेखकले विपक्षमा मतदान गर्न आग्रह गरेका छन् । यसअघि नेकपा एमाले, रास्वपा, नेकपा एस र जसपाको नयाँ सत्ता समीकरण बनेपछि सरकारबाट बाहिरिएको काँग्रेसले बिहीबार सरकारलाई दिएको समर्थन फिर्ता लिएको थियो ।
सरकारलाई दिएको समर्थन कुनै दलले फिर्ता लिएमा ३० दिनभित्र प्रधानमन्त्रीले विश्वासको मत लिने संवैधानिक व्यवस्था रहेको छ । सोहिअनुसार काँग्रेसले समर्थन फिर्ता लिएपछि प्रधानमन्त्री प्रचण्डले यहि फागुन ३० गते विश्वासको मत लिने प्रयोजनका लागि संसद सचिवालयलाई पत्र पठाएका थिए ।
