गत फागुन २३ गते बागमती प्रदेशमा नेपाली कांग्रेस सरकारबाट बाहिरिँदै समर्थन फिर्ता लिएपछि मुख्यमन्त्री शालिकराम जम्कट्टेलले आज विश्वासको मत लिने भएका छन् । कांग्रेस सरकारबाट बाहिरिएर समर्थन फिर्ता लिएपछि मुख्यमन्त्रीले विश्वासको मत लिने भएका हुन् ।
विश्वासको मत लिने भएसंगै प्रदेश सभा भवन, हेटौडामा दिउँसो १ बजेका लागि बैठक बोलाइएको छ । आजको बैठकमा मुख्यमन्त्री शालिकराम जम्कट्टेलको विश्वासको मतसम्बन्धी प्रस्तावमा छलफल हुने प्रदेशसभाका सभामुख भुवनकुमार पाठकले जानकारी दिएका छन् ।
बाग्मती प्रदेशका मुख्यमन्त्रीले ११० सदस्यीय प्रदेशसभामा ५६ मत जुटाए मुख्यमन्त्रीमा कायम रहनेछन् । बिहीबार नेकपा एमाले, माओवादी केन्द्र, एकीकृत समाजवादी र हाम्रो नेपाली पार्टीबीच सहमति भएपछि मुख्यमन्त्रीले आवश्यक बहुमत जुटाएर विश्वासको मत लिने भएका हुन् ।
प्रदेशसभामा सत्तापक्षबाट नेकपा एमालेको २७, नेकपा माओवादी केन्द्रका २१, एकीकृत समाजवादीका ७ र हाम्रो नेपाली पार्टीका २ सदस्य रहेका छन् भने प्रतिपक्षमा नेपाली कांग्रेसका ३७, राप्रपाका १३ र नेमकिपाको ३ सदस्य छन् । केन्द्रमा आएको सत्ता गठबन्धन परिवर्तन पछी त्यसको असर प्रदेश सरकारमा समेत परेको छ ।
