नेपाली कांग्रेसकाे आज बस्ने पार्टीको पदाधिकारी बैठकमा सभापति शेरबहादुर देउवा सहभागी नहुने भएपछि उपसभापति पूर्णबहादुर खड्काको अध्यक्षतामा बैठक बस्ने भएको छ । बैठक आज दिउँसो १ बजे ललितपुरको कोपुण्डोलस्थित होटल हिमालयमा बस्ने भएकाे हाे ।

भदाै २३ र २४ गते भएकाे जेनजी आन्दोलनपछि देउवा पार्टीका प्रत्यक्ष बैठकहरूमा सहभागी भएका छैनन् भने उनले केही नेताहरूसँग भर्चुअल माध्यमबाट छलफल गरेको पार्टी स्रोतले जनाएको छ । भदौ २४ गते जेनजी आन्दोलनको दोस्रो दिन, देउवा र उनकी पत्नी आरजु राणामाथि बुढानीलकण्ठस्थित निवासमै कुटपिट भएको थियो ।

यता नेकपा (एमाले) का अध्यक्ष केपी शर्मा ओलीले आज भक्तपुरमा हुने कार्यक्रमलाई सम्बोधन गर्ने बताइएकाे छ । भक्तपुर जिल्ला कमिटीले सूर्यविनायक नगरपालिका-७, गुण्डुमा आयोजना गरेको कार्यक्रमलाई ओलीले सम्बोधन गर्न लागेका हुन् । उक्त कार्यक्रममा पार्टीका महासचिव शङ्कर पोखरेलसहित केन्द्रीय तथा स्थानीय तहका नेताहरूको उपस्थिति रहनेछ ।