कालोधनलाई सेतो पार्ने सेता नेपालीका काला धन्दाबारे ठूलै खुलासा भइसक्दा पनि कुनै छानबिन सुरु भएको छैन। पहिले स्वीसवैंक काण्डको पोल खुलेको थियो, त्यो त्यसै सेलायो। अहिले पनामा पेपर्स लिकबाट कालोधन राख्ने १३ जनाको नाम आइसक्दा पनि अनुसन्धान सुरु हुनसकेको छैन। आखिर सरकारभन्दा पनि शक्तिशाली छन् कि के हो यी काला धनवालाहरु? लोकतन्त्रमा लोकशाहीभन्दा शक्तिशाली कोही नहुनुपर्ने हो, तर लोकभन्दा अरु नै शक्तिशाली देखिए, कस्तो आश्चर्य? नहुनुपर्ने जति काम नेपालमा मात्र हुनेगर्छ।
कालोधनलाई सेतो बनाउने, सम्पत्ति लुकाउने र अवैध मुद्रा कारोवार गर्नेहरुको सूची सार्वजनिक गर्ने पानमा पेपर्स काण्डमा १३ नेपाली मुछिएका छन्। यी १३ नेपाली को को हुन्, यिनको वैंक खाता र कारोवार के कस्तो छ भनेर नेपाल राष्ट्र बैंकले विशेष निगरानी गर्न र सजगता अपनाउन बैकर्सहरुलाई निर्देशन जारी गरेको छ। नेपालमा व्याकडोरबाट ११ अर्व भित्र्याइसकेका र थप ३ अर्व भित्र्याउने चक्करमा लागेका अजय सुमार्गीको नाम पनामा पेपर्समा अहिलेसम्म देखिएको छैन। र, साथै हाइड्रो, होटल, तस्करी, शेयरधन्दा गर्नेहरु जो कालोधनका मालिक मानिन्छन्, तिनको नाम पनि कालोधन्दा र धनमा नहुनु गजवै भएन त?
पहिले हदवन्दी लाग्दा जमिनदारहरुले कुकुरको, नोकरको, आफन्तको, नातेदारको नाममा जग्गा लुकाएर बचाएका अनेक घटना छन्। कीर्तिनिधि विष्टदेखि यादवप्रसाद पन्तजममका जमिनदारले जमिन लुकाएका घटना सुनिएका हुन्। कतै कालोधन लुकाउनेहरुको १३ जनामा ठूला धनाध्येको नाम नआउनुमा तिनले पनि त्यसै प्रविधि अपनाएर लुकाएका त होइनन्? कालोधन लुकाउने १३ जनाको हैसियत नै कालोधन कमाउने छैन, कसरी लुकाए होलान् तिनले कालोधन? हैसियतवालाहरु पर्दापछाडि संरक्षक त छैनन्?
अहिले सार्वजनिक भएका १३ नेपालीमा विजेनद्र जोशी, विजेशकुमार तोडी अग्रवाल, विमल काजी ताम्राकार, बिनु श्रेष्ठ, विश्ववरसिंह थापा, विश्वधर तुलाधर, डा.श्यामबहादुर कर्मचार्य, हरिशकुमार तोडी, प्रा. शतेन्द्रकुमार गुप्ता, रोजेन्द्र काब्रा, रेनुका प्रधान, रेखा काब्रा र शशीकान्त अग्रवाल रहेका छन्। अग्रवाल बाहेक अरुको हैसियत नगण्य मानिएको छ।
खोजी पत्रकारहरुको अन्तर्राष्ट्रिय संस्था इन्टरनेशनल कन्सोर्टियम अफ इन्भेस्टिगेटिभ जर्नालिस्टले सार्वजनिक गरेको विवरणमा यी १३ नाम बाहेक अरु पनि हुनसक्ने बताइएको छ। यी १३ जनाले ट्याक्स हेभनमा उडस्टोक युनिभर्सल लि., वर्ल्ड डिीसट्रव्यूसन प्रालि, हिमालय इन्भेस्टमेन्ट ग्रुप लि.जस्ता कम्पनी दर्ता छन्। यी सबै कम्पनी कर छल्ने र सम्पत्ति लुकाउने उदेश्यले खोलिएका हुन्।
एकातिर स्वीस वैंकमा ३ खर्ब लुकाउने नेपालीहरु नै थिए भने कर छली गर्ने र कालोधनलाई सेता पार्ने धन्दामा पनि १३ नेपाली मुछिएका छन्। यिनले खोलेका कम्पनी सबै प्रालि कम्पनी भएकाले ती कम्पनीमा अरु को को संलग्न छन्, बिस्तारै सार्वजनिक हुादैजाला तर यथार्थ के हो भने शशीकान्त अग्रवाल बाहेक नामचलेका कुनै पनि बिगहाउस सिधै मुछिएका देखिएका छैनन्। तर तिनका आफन्तजनका नाममा बिग हाउसहरुले कम्पनी दर्ता गराएर कालोधनलाई सेतो बनाउादै आएको हुनसक्छ। यसको खोजबिन गर्न राज्यले तत्काल ध्यान दिनुपर्छ। सिद्धभवनका विजेन्द्र जोशीले मात्रै आफ्नो नाममा खोलेको वर्ल्ड डिस्ट्रिव्यूसनको रेकर्ड सार्वजनिक गर्ने हो भने लहरो तान्दा एउटा स्थापित व्यापारिक घरानाको आन्द्राभुाडीको पहरो गर्जने दावी स्रोतले गरेको छ। अरु पनि धेरै आश्चर्यजनक नामहरु सार्वजनिक हुनसक्छ, यदि यसबारेमा खोजी पस्ने हो भने।
झिना मसिना कुरामा छानबिन गर्ने अख्तियार र सीआईवीले स्वीस वैंक र टेक्स हेभनमा खोलिएका खाता र तिनले नेपालमा गरेको लगानीको रेकर्ड हेर्ने हो भने नेपालका ठूलै राजनीतिक पार्टी, ठूला व्यापारिक र उद्यमी घरानाहरुको मुखुण्डो उत्रने चर्चा आर्थिक फााटमा चल्न थालेको छ। यो चर्चामा दमचाहिं छ है।
